Ганцаараа аялалд гарах нь зориг шаардсан алхам хэдий ч өөрийгөө таних боломж, бие дааж, санхүүгээ өөрөө удирдах, шинэ туршлага хуримтлуулах, шинэ хүмүүстэй танилцах илүү бүтээлч болох эрх чөлөөг мэдрүүлэхийн зэрэгцээ өөртэйгөө өнгөрүүлэх үнэ цэнтэй цаг хугацааг бэлэглэдэг онцгой шийдвэр юм. Тиймээс хэрэв та ганцаараа аялах талаар бодож байгаа эсвэл аль хэдийн шийдсэн бол таны аяллыг илүү амжилттай, аюулгүй болгоход туслах зөвлөгөө, мэдээллийг хүргэж байна. 

Очих газраа сонгох : 

Очих газраа сонгохдоо тухайн газрын аюулгүй байдлыг сайтар шалгаж, гэмт хэргийн түвшин ямар байгаа болон ганцаараа аялахад ээлтэй эсэхийг мэдэх нь чухал. Мөн явган болон нийтийн тээврээр зорчиход хэр тохиромжтойг урьдчилан судалж үзээрэй6

Аюулгүй байдлаа хамгаалах : 

Паспорт болон бичиг баримтаа цахим болон цаасан хувилбараар авч явахын зэрэгцээ аяллын хуваарь, холбоо барих мэдээллээ ойр дотны хүмүүстээ урьдчилан үлдээх нь зүйтэй.

Санхүүгээ удирдах : 

 Санхүүгээ зөв удирдахдаа нэг газарт удаан саатах уу эсвэл олон газар дамжих уу гэдгээ төсөвтэйгээ уялдуулан төлөвлөж, нэг дор их хэмжээний мөнгө авч явахгүйгээр карт болон бэлэн мөнгөө хуваан хадгалах нь зүйтэй.Очих, сонирхож үзэх газраа судалгаагаа хийх.

Очих газрынхаа талаар судлах : 

Онлайн эх сурвалжийг зөв ашигласнаар бодит мэдээлэл авах хамгийн хурдан арга болдог. Жишээлбэл, YouTube болон TikTok дээрээс тухайн хотын аяллын влог, “solo travel” бичлэгүүд үзэх нь шууд туршлагыг мэдрэхэд тусална. Мөн TripAdvisor, Reddit-ийн r/solotravel зэрэг аяллын блог, форумуудаас бусдын санал, зөвлөмжийг уншиж судлаарай. Үүнээс гадна Google Maps дээрх үнэлгээ, зураг, хэрэглэгчдийн ‘Lists’-ийг ашиглан өөрт хэрэгтэй газруудаа хадгалах боломжтой. Түүнчлэн тухайн газарт өмнө нь ганцаараа аялсан хүмүүсийн сэтгэгдлийг үзэж, ‘safe areas for solo travel’ гэх мэдээллийг хайснаар гэмт хэргийн түвшин болон шөнийн цагаар аюулгүй эсэхийг урьдчилан мэдэж боломжтой.

Ачаагаа аль болох хөнгөхөн байлгаарай :

Ганцаараа аялалд хамгийн хэрэгтэй зүйлсийн чеклист (паспорт, power bank, эрүүл мэндийн жижиг багц, олон улсын залгуур гэх мэт) Аялалдаа гарахдаа зөвхөн зайлшгүй хэрэгтэй зүйлсээ авч, хослуулж өмсөхөд амар хувцас сонгоорой. Ингэснээр та илүү эрх чөлөөтэй хөдөлж, аялалдаа ядралгүй, тав тухтай өнгөрүүлэх боломжтой.

Аялалдаа хэрэг болох апп-уудаа урьдчилж татаж аваарай : 

Ганцаараа аялахдаа холбоотой байж, хэрэгтэй аппликейшнүүдийг ашиглах нь таны аяллыг илүү аюулгүй байлгана.  Жишээлбэл, eSIM эсвэл орон нутгийн SIM карт авч датагаа найдвартай байлгах нь чухал. Google Maps-аар чиглэлээ олох, буудал болон рестораны үнэлгээг харах боломжтой бол Google Translate хэлний бэрхшээлийг түргэн шийдэхэд тусална. Grab, Uber, Bolt зэрэг апп-аар албан ёсны такси дуудах нь таны аюулгүй байдлыг хамгаална. TripAdvisor, Booking, Airbnb нь буудал болон үзмэрийн мэдээллийг баталгаатай өгөх бол WhatsApp, Messenger нь гэр бүл, найз нөхөдтэйгээ өдөр бүр холбоотой байхад хэрэгтэй. Ийм апп-уудыг урьдчилан татаж аваад offline map болон орчуулгын тохиргоог хийгээд авбал интернэт тасарсан үед ч санаа зовох зүйлгүй.

Нутгийн иргэдтэй ойрхон харилцаарай : 

Ганцаараа аялж байгаа үед хамгийн сайхан туршлагын нэг бол нутгийн хүмүүсээс суралцах, тэдэнтэй дотно харилцаа тогтоох юм. Ингэснээр та тухайн газрын жинхэнэ өнгө төрхийг мэдэрч, аяллаа илүү дурсамжтай болгоно. Хэрэгтэй үед тусламж хүсэхэд их тус болдог шүү.

Шинэ газар очиход хамгийн энгийн боловч хамгийн хүчтэй сэтгэгдэл төрүүлдэг зүйл бол инээмсэглэл. Тухайн орны хэлээр “баярлалаа, уучлаарай ” гэх үгсийг хэлэх нь нутгийн хүнд таатай сэтгэгдэл төрүүлдэг.

Ганцаараа аялсан таны дурсамж бол насан туршийн хамгийн үнэ цэнтэй хөрөнгө байх болно. ????